عیش و عشرت

 انگلستان کا بادشاہ رچرڈ اول (1199-1157) جس نے تیسری صلیبی جنگ لڑی، وہ ایک بڑی فوج لے کر شاہ مصر صلاح الدین ایوبی (1193-1137) کے مقابلہ کے لئے نکلا۔ رچرڈ کی فوج کے افسانے اس طرح مشہور ہو رہے تھے کہ مسلمانوں کی فوج میں پست ہمتی کے آثار پیدا ہوگئے۔ صلاح الدین ایوبی نے اپنے دو خاص جاسوسوں کو طلب کیا اور ان کو حکم دیا کہ وہ جائیں اور رچرڈ کی فوج کے حالات معلوم کریں۔ جاسوس بھیس بدل کر روانہ ہوئے اور عیسائی فوج میں داخل ہوگئے۔ ایک رات اور ایک دن انہوں نے ادھر ادھر پھر کر عیسائی فوج کا جائزہ لیا۔ واپس آکر انھوں نے صلاح الدین ایوبی کو خبر دی کہ ہم نے عیسائی لشکر کے خیموں میں دو باتیں خاص طور پر دیکھیں۔ ایک یہ کہ ان کے فوجی شراب و کباب میں مست ہیں اور رنگ رلیاں منا رہے ہیں۔ دوسری بات یہ کہ فوج کے ساتھ جو پادری آئے ہیں وہ مذہبی بحثوں میں مشغول ہیں۔ ہم نے ان کو اس مسئلہ پر بحث کرتے ہوئے پایا کہ حضرت عیسی کا پیشاب پاخانہ پاک تھا یا ناپاک۔


صلاح الدین ایوبی نے یہ روداد سننے کے بعد اپنے فوجی افسروں کو بلایا اور ان کے سامنے تقریر کرتے ہوئے کہا: خدا کی قسم عیسائی فوج رسوا ہو کر رہے گی۔ جس قوم کا یہ حال ہو کہ اس کے خواص عیش و عشرت میں غرق ہوں اور اس کا مذہبی طبقہ اپنے پیشواؤں کی فضیلت پر بحث مباحثہ میں مشغول ہو، خدا کے یہاں اس کا یہی انجام مقدر ہے۔ تم خدا کے بھروسہ پر آگے بڑھو۔ یقینا تم ہی کامیاب ہوگے۔ اس کے بعد صلاح الدین ایوبی کی قیادت میں اس کی فوج آگے بڑھی اور عیسائی فوج کو ایسی سخت شکست دی کہ وہ میدان چھوڑ کر بھاگ گئے۔


کسی قوم کے کمزور اور زوال یافتہ ہونے کی یہ خاص پہچان ہے کہ اس کے مذہبی رہنما فضول قسم کی مذہبی بحثوں میں مشغول ہوں اور اس کے دنیوی رہنما فضول قسم کی عیاشیوں میں۔ فضول قسم کی مذہبی بحثیں اس بات کی علامت ہیں کہ آدمی کا رشتہ معنوی حقیقتوں سے ٹوٹ چکا ہے۔ اس کے پاس مذہب کا خول باقی رہ گیا ہے نہ کہ اس کی حقیقت۔ پھر جو لوگ الفاظ کی دنیا میں جی رہے ہوں وہ حقیقت کی دنیا میں کوئی کارنامہ کس طرح دکھا سکتے ہیں۔ اسی طرح قوم کے بڑوں کا فضول عیاشیوں میں مشغول ہونا اس بات کی علامت ہے کہ زندگی ان کے نزدیک خوش باشی کا نام ہے نہ کہ جدوجہد کا۔ وہ ذاتی خواہش میں جی رہے ہیں نہ کہ زندگی کے وسیع تر تقاضوں میں۔


طلسماتی مذہب ذہنی پستی پیدا کرتا ہے اور طلسماتی عیاشیاں عملی کمزوری۔ اور جن لوگوں میں یہ دونوں چیزیں جمع ہو جائیں ان کو کوئی چیز تباہی سے نہیں بچا سکتی۔



تبصرے

ایک تبصرہ شائع کریں

اس بلاگ سے مقبول پوسٹس

لوگوں کی باتوں کو پسِ پشت ڈال دیجئے

تصویر
                لوگوں کی باتوں کو پسِ پشت ڈال دیجئے  ایک دفعہ ایک گھوڑا ایک گہرے گڑھے میں جا گرا اور زور زور سے اوازے نکالنےلگا. گھوڑے کا مالک کسان تھا جو کنارے پہ کھڑا اسے بچانے کی ترکیبیں سوچ رہا تھا. جب اسے کوئی طریقہ نہیں سوجھا تو ہار مان کر دل کو تسلی دینے لگا کہ گھوڑا تو اب بوڑھا ہو چکا ہے، وہ اب میرے کام کا بھی نہیں رہا، چلو اسے یوں ہی چھوڑ دیتے ہیں، اور گڑھے کو بھی آخر کسی دن بند کرنا ہی پڑے گا، اس لیے اسے بچا کر بھی کوئی خاص فائدہ نہیں. یہ سوچ کر اس نے اپنے اپنے پڑوسیوں کی مدد لی اور گڑھا بند کرنا شروع کر دیا. سب کے ہاتھ میں ایک ایک بیلچہ تھا جس سے وہ مٹی، بجری اور کوڑا کرکٹ گڑھےمیں ڈال رہے تھےگھوڑا اس صورت حال سے بہت پریشان ہوا. اس نے اور تیز آواز نکالنی شروع کر دی. کچھ ہی لمحے بعد گھوڑا بالکل خاموش سا ہو گیا. جب کسان نے جھانکا تو یہ دیکھ کر حیران رہ گیا کہ جب جب گھوڑے کے اوپر مٹی اور کچرا پھینکا جاتا ہے تب تب وہ اسے جھٹک کر اپنے جسم سے نیچے گرا دیتا ہے اور پھر گری ہوئی مٹی پر کھڑا ہو جاتا ہے. یہ سلسلہ کافی دیر تک چلتا رہا. کسان اپنے پڑوسیوں کے ساتھ مل کر مٹی اور کچرا پھینکتا
مزید پڑھیں

نتیجہ فکر

تصویر
 🖋نصیر ناصر اگر آپ کو اپنے مذہبی،سیاسی نظریہ پر یقین نہیں۔توآپ بے سمت مسافر ہیں۔جس کی کوئی منزل نہیں ہے۔ اگر آپ اپنے مذہبی،سیاسی نظریہ کے حوالہ سے مخالفانہ فکرکو سننے، اس پر غور کرنےاور دلیل وشائستگی سے اس کا رد کرنےکی بجائے گالم گلوچ اور طعنہ وتضحیک کو اختیار کرلیتے ہیں۔تو آپ کنفرم جاہل اوراندھی تقلیدیاشخصیت پرستی کاشکار ہیں۔ اگرآپ اپنے مذہبی یا سیاسی نظریہ کی سچائی کو دل سے تسلیم کرتے ہیں۔تو آپ کو اس پر دلیل کے ہتھیار سے لیس ہوناپڑے گا۔مگر دلیل بھی وہ جو آپ کے نظریہ کی برتری حقائق کے ایسے معیار سے ثابت کرے۔ جس معیار کو آپ دوسروں کے معاملہ میں بھی تسلیم کرسکیں۔ اکثر دیکھاگیا ہے۔کہ بہت سارے بظاہر سنجیدہ فکر حضرات بھی جس معیار پر دوسروں کو پرکھتے ہیں۔ خود کو اس معیار سے پرکھنے کی اجازت نہیں دیتے۔ جس معاملہ کو دوسرے کیلیےقابل گرفت گردانتے ہیں اپنے طبقہ کے کردار میں جائز ثابت کرنے کی کوشش کرتے ہیں۔  خدارا فکری انحطاط اور جذباتیت کی بجائے سنجیدگی ، متانت اور شائستگی کو فروغ دیجئے۔ اگر یہ ممکن نہ ہو تو کسی بھی فورم پر ایسا خیال پیش ہی نہ کیجئے۔جس پر آپ دلیل سے عاری ہوں۔ یا مخالفانہ دلائل ک
مزید پڑھیں